Tun Thlaah NLUP Sem Ngei Dawn. Tih Tur Dang Tamtak A La Awm Cheu
Lawngtlai 12th Oct’ 2010 (tue) : Nimina NLUP Implementing Board inkhawm Horticulture Department Conference Hall-neiah Chairman Pu R.Selthuama chuan tun October thla chhung ngei hian NLUP sem tan thei tura inbuatsaih a nih thu a sawi a, chumi hmaa thil pawimawh la tihfel ngaite an ngaihtuah.
Heng an ngaihtuah zingah hian thingtlang khuaa NLUP ram theh dan tur te, thingtlang khaw thenkhat NLUP ram theh tur nei ve lo te, NLUP hi sawrkar laipui Rural Development Ministry-in an rawn vil (monitor) dawn avanga monitoring system mumal tak siam chungchang te, khaw thenkhat, an awmna district leh Assembly constituency inmil lo te, khaw hrang hrang tana an khaw leilung leh boruak a zira NLUP trade/activity target siam chungchangte an ngaihtuah a ni.
Sawrkar press release-in a sawi danin, heng bakah hian trade thenkhat, a hmin hun chhung rei deuh thlangtuten an lo intunnun lailawkna tur (secondary crop) an thlan theih dan tur pawh ngaihtuah a ni a. RIPANS laboratory thuam that leh tihchangtlun dan tur te, sawrkarin sum tamtak senga ram pawn atanga ranchaw a lak thin titawpa contract farming hmanga Mizoram chhunga thar theihte hmang tangkaia intodelh dan kawng dap te, ram chhunga kuhva thar chhuah, ram pawna an lei hnua man to zawka Mizorama lolet leh thin, Mizoram chhung ngeia a vawnthat leh sawngbawl (preservation and processing) hmanga tihtawp a nih theih dan tur ruahmanna fel tak neih chungchang leh thil dang pawimawh tak tak an rel.
No comments:
Post a Comment