A Rem si lo

A sakruang leh kimtlanga hmangaihna bet tel tlat mai te chu sawi tel pawh a tul lem lo'ng, a mit mengmawi leh biangsum inchawih tawn zia lek fang phei chu a hmel hmu thintute chuan ANGEL an ti a nih pawhin an mawh lo ve, chu chu fakna uchuak a ni hauh dawn si lo va. Chu ai mah chuan thenrual kawm thiam tak a nihna chuan lengzawngte a tihlim a, tu hriatpui si lo hian tatu nih an phu hliah hliah vek ang a, ka chanpual lo ti mai tawk te pawh an awm ta ve ang. A ankanem thlum tak mai avang te chuan hringnun timawii lo titawk te pawh an awm mai thei e, tu hriat va ni suh.
Chutianga a rualkawm thiamna leh a hmelthatna te chu chhuanpui mai a hnekin a thiante tichapo tirtu a ni hial zawk a, a bula chen a nawm tlukin a thian nih pawh insawitheihna tham hial a tling ta ve ang. A tawnah ka luangliam lo a nih pawhin ka tuiral mai ang titu pawh Mizo tlangval zingah hian an kat nukin ka ring. A ni, Pasaltha Vanapa pawh kha la dam teh reng se, he Tuaitiri tawnah hian zawng, tui ang a nem duai ve thovin ka ring.. Chu ngei mai chu Thlang sappui Lanu an lo tih mitmeng pawl ralh mai leh bahsam buang hnap mai, han en mai chuan vantirhkoh thlah emaw tih mai tura fai nalh a ni a. A han hawi zawnga a sam buang thak mai a han invawrh phingphileng siau siau mai te chu thlunglu tihaitu a va ni teh lul em.
A sakruang leh kimtlang mawina te, a lungril leh ngaihtuahna tluangtlam tak leh a thenrual kawm thiam zia pawh kan sawi tawh a, a hmelhriat nih pawh chapopuina tham hial a tlin thu kan sawi tawh bawk e. A ni, tlangval a zawnga tlangval berhchep ve tak, hmel leh pian zia-ah nise chhuan tur nei hawt lo, mongoloid thlah tih taka hnar bang sang lo ve tak leh mitmeng zim set mai tan chuan a voh bik nih chu vawikhat dam ve manah han hnar chu har tak tur a ni ngei mai. Hei lo liama lei malsawmna enge awm chuang ti hial duh pawh an awm mai thei e. Mahse ......? A Rem Si Lo ! A ni, Thlang sappui ngai bil lova kan lenna Zotlang mawitu runlum nuthai atan chuan Zolanu ngat le...
( Zolanu ten ‘Kei zawng ka thlang Mizo Val nge’ an tih ti thei ve zel thei sela, kan ramah hian hnam dang hi an pung tual tual lo tur a nia, Vai makpa, Vai tupa nei Zofa kan pung tual tual mai si a, hnam dang tan A Rem Si Lo kan ti ve dawn em le. Mizo mipa ten hnam dang nupui a neih an duh loh laiin Mizo hmeihchhia ten hnam dang an nei leh tlat \hin hi a pawi a ni.)