Thlasik a ral a, nipui a lo thaw tan leh tar eng mai. Hawina lam apianga tiau chum zing paw chuai mai te leh boruak hnawng churh maite pawh chuan England ram a kiansan a. Khawi ilo chhuahvah chakawm khawpin khua a thiang mawi ve leh ta.
Heti ang hun a lo thlen hi chuan thenawm Ireland rama thingtlang khaw lian lo tak, ngaihhlut leh ngaihpawimawh hlawh lo zet mai pakhat hi ka rilruah a lo lut thuai a. Calendar thlek hauh lo pawhin Irish Rose,tualto buk mawi tak kha tunah zawng a vul tan leh ta, tih hi ka zungzam hian a hre thuai thin. Tualto tih takah Biak In kawmchara thlanmual sir kil, thlan lungdawh khi kara to kha a ni a. Tunah zawng thlasik vur sur leh thli vawt tuar zovin, tuihnai duhawm taka var no ser khan a rawn vul leh tawh ngei ang le. A mawi a, a duhawm a, a thianghlim tehlul nen, tu lawm leh hlutsak tehchiam a hlawh lo va. Mahse, ka tan erawh a aia ennawm hmuhnawm ala awm hleithei lo. Chui a vullai ni rei lo te ah chuan va hmuh hman ngei ka tum thin a. Thildang hnan tul pawhin min dal a rem thin lo.
Kum tam a liam ta. Kum liam tawhte ka han chhut pawh hian ka kutzungtangte hian a daih ta lo hial mai….
He thingtlang khua hi a awm tih hre hauh lovin Medical College ah doctor ka zir zo kha a ni a. Doctor puitling ni tur a practical ka tihna hmun tur bial chhungah a lo tla ve hlauh mai a. A penhleh bik em avangin ka tlawh tur khaw dang zawng zawng ka fan chhuah vek hnu ah, chu khua chu ka pan ve leh ta a ni. Lirtheia thlen theih bak a nih avangin mel tam tehchiam lo ke in ka kal leh a. Chumi hnu ah thlan tla hluamin chu khua chu ka va dakpu thlen ve hlawl mai a nih kha.
An khaw hotu In awmna ka zawng zui ta nghal a. Chutia an kawtthler bumboh tak leh khawharthlak angreng tak ka zawh hnak hnak lai chuan, piah deuh hlek ah hian nula pakhat, pawnfen tlang huh chap mai, naute hram tawh tak paw chunga tui pump chhuahna lo nem bu tlauh tlauh hi ka va hmu a. A bucket chu a dawh khat a. Ka lam pan chuan a rawn khai phei ta taih taih a. A nau puak chum tak nen, a tui khai chu a tan chuan a rit lam mah a ni. Ka bul a rawn thleng a, a nau puak ka han hmuh chuan ka phu zawk mai. Chu naute hmai chu a lom sen vur mai a. Sin te te hian a bit tak main a bawl chhuak vek lehnghal.
Inngaihtuah chiang hman mang lo hian chu nula chu ka'n zap ding a. Hah hmai sen ap ap hian a tui khai chu ka sirah a'n nghat a. A sam eng vingvial tle ser mai, a hmai lama thlur hrang tla deuh niai karah, a mitmeng fim thianghlim tak, fiah dumpawl raih chuan min rawn melh chho ha mai a. Kei mikhual tlangval, dawldang tak, suit hlui da rap tawh ha a, savun ip khai hlui uk khak mai lo khai chu, kawm kara sete hmai rang danchep ang mai niin ka inhria. Ka chhan sen hauh loh tur zawhna hlir mai a hmelah chuan ka zuk chhiar thei nghal a. A nau puak ka han thlek leh a, thlah khat an nih hai rual a ni lo. Chutih laiin nula thalai, vanglai hun hmang tan mek chauhin nau pawm chhangchhiat cheta a han che chu a inzahppui hauh lo tih zawng a langchiang hle bawk.
Eng sawi ta lo chuan a nau puak chu a chalah ka kutin ka va deh sak a. Chu mipa naupang lah chuan hmelhriat loh khawih hrethiam lovin a tal ta arh arh a. Tah a han tum a, a tap chhuak hleithei lova. Ka zir thiamna atang kher lo pawhin chu naupang duhawm tak chuan tangseh leh awmna a vei kawp mek a ni tih hai rual a ni lo.
Chu fahrah naupang khawngaihthlak tak Michael-a an tih chu a nu in raicheh in a thihsan a. An upa ber, Rose-i chuan loh theih loh a nu ber nih te, a naute pathum enkawlte chu a fawmkem a ngai ta a lo ni. Pa ber lah a nupui a sun atang chuan harhfim leh biaktlak lai a awm ta lo reng reng mai a.Chuti chungin an khua ah mistiri dang awm ta lo chu harhfim mang lo chunga inhlawhna tur erawh a la hmu ve phauh phauh reng bawk. Mahse a thawhchhuah apiang chu in lama a fa te ei ral aiin zu hmuna a sen ral a tam zawk zel bawk si.Chuti ang dinhmun ah chuan a fa te pawh sikul han kai zui thei an awm bar lova. An upa ber Rose-i ho chuan engtin tin emaw ni an la vuiliam ve tawk tawk zel a ni.
Chung thu ngaihnawm lo tak mai an khaw hotu'n min hrilh lai chuan kan lung a chhe dun hle a n I ngei ang, kan in en tha ngam meuh lo. Hnawhsarum takin Rose-i te unau awm dan tur chu kan rel sak ta chuk chuk a. heti ngawt bhi chuan rei an daih thei dawnin kan hre lo.
Rose-i nau Patrict-a chu an khua a buh-deng-khawl neitupa, pa nelawm leh dam thluam mai hnenah chuan awm ta mai se la. A nau Andrew-a chu an khaw postmaster hnenah a awm thung ang. Khua atanga melt hum velah hian bawng vulh a eizawng, Pu Kendell-a te nupa rek an awm a, an khawsa thei hle nghe nghe. Chutah chuan Rose-I leh a nau te ber, Michael-a chu an awm ve thung ang. Kei atan pawh damdawi in atanga ni tin ka va tlawh phak a lo ni ang a. Rose-i tan pawh a pa leh a unau dangte a va chiauau pha reng dawn bawk.
Rose-i chuan a nau Michael-a chu kan damdawi in lama rawn awmpui mai hnial lo se ka tih tehlul nen, a unau dangte hlatsan chu a duh lo ber mai si a. Pu Kendall-a farm ah chuan an ngaihtuah-awm chuang lo ang chu.
Khaw dangah tangseh hri kha a leng zui ve leh ta mai si a. Rose-i te pawh ka tlawh zui leh hleithei ta hauh lo. Pu Kendall-a farm ah chuan nurse pakhatin nitin in Michael-a chu a va kan thin a, zing lamah report mion rawn pe thin a. Tuk khat chu dan pangngaiin nurse chuan report min rawn pe leh a, "Michael-a u, nula fel tak mai khanan khua i tlawh thu hi a sawi bang thei lova. I hmingte leh I chanchinte min zawt dilchhut khawp mai. Hmuh che a chak hle a n ih ka ring. Doctor I nih thu te ka hrilh a. Chumi hnu ah erawh engmah a sawi zui duh ta lo. Nimin khan an khaw lamah a haw phei a. A hmel a nguiin a dam that loh hmel hle in ka hria a. Ka han zawh lah chuan, 'Ka tha, ka dam', a ti tlat si a", a rawn ti a.
Thawhtanni exam tur ka neih avangin chumi tuk inrinni leh Pathianni chu ka inkharkhip a. Thawhtanni tlaiah erawh Rose-i te khaw lam panin ka in khalh chhuak leh ta. Kawngtum ngai zawhin an khua chu ka va thleng a. Khaw tawntirh a Biak In kawmchar, thlanmual atan a an hman chu ka han pel mai dawn a. Leivung tharlam tak hi a lo vung thar mai. Thing tawn chhe te hi a lo insawhphun ngat mai bawk a….
Bing chuai chuai in thlan tharlam lam chu ka pan a. Kekawr khup bal khawn tlar khawpin ka thingthi tar eng mai a. Ka pen ka phawi a. Thing kawkalh lo insawh-phun ah chuan ziak tur leh lamrik tur ka hriat chhun-
ROSE
tih hi hnukulh teuh chungin ka ziak ta a. Kar lovah khua in min rawn thim hnan a. Mi mut reh hma deuh zawngin haw nachang ka hr eve leh ta a ni awm e.
Irish Rose, rose tual to par var sar mai, kum alo vei apiangin a mawina leh duhawmna hloh hauh lo, ka tan mawi zual deuh deuh a rawn vul ziah thin Irish Rose kha! Lettu - S. Ronghinglova, MCS (Rtd)
No comments:
Post a Comment