Khuhhawnna: Hmanni chu Munirka ah chhungten pawisa min lo thawn leh hlawla, haw lampangah inti thei zetin Nickelback- Rockstar tih hla kha ka ngaithlaa, inti vei zet in ka kal awr awra, kan inchhuih khut mai nih kha. Ka hawi hruk hruka, tuman min en lo tih ka hriat chuan Bus stand ah Bus changin ka thua, hla ka ngaithla ka ngaithlaa, Sp-i hla ‘ka dem lo che’ tih kha kan play a, lung a leng thar thut lehpek a nih kha.
Vai za tam zi nuaih nuaih kara lungleng hmasa berte pawh ka ni ta ve ang. Ngaih a zeng ka neih pawh ka hre silo, mahse tiang hunah hian ngaihzawng kan hriat tirh ve det deta, kan lo chhai ruk ve, a taka kan lantir ngam loh laite kha kan han hrechhuak ve leh hnuhnawha, lung hi a leng thar ve leh em em thin.
Thupuiah lut thut ang:
Thianpa siama nen kan college bang haw, kan kaldun lain kan hmalama vai nula pathum lo kal, chhe lo tak tak kan tawha, siama’n thlirzui vawng vawng paha, han ngai-zawng thei mai ila chu aw!!! A tih zui vawng vawng kha rilru ah a lo luta, vai hmeichhia ngaihzawn chakna kan neih tlat pek chu le!. Tichuan heti hian rilru ka siama, vairam awm manah vai hmeichhe pakhat tal ngaihzawng ve chin hrim hrim eng tih hi!
Mahse: Mahse engtin? Ka huphurh ngang mai. Pakhatnaah chuan ka HMEL hi- ka hmel hi chhia chu ka ti hran lo, mahse thian te leh ngamtlak dang ten ka hmel hi tha an ti lo hle tih ka hria. Chuvang te pawh aniang, thianten ngaihzawng an neih sap sap laia, ka la ui chuang thut reng ni. hmelin puak te lo ti ve deuh nise, ‘kha hmeichhia kha’, tiin thianpa siama te angin hawrawpuiiin kan lam ri ve fawk fawk tur. Tin a reng reng thuah min lo duh ve hlauh te pawh ni ta se, buaina liam tham tak a la awm fo!
A pahnihna ah chuan BABEL insang kha a ni. inngaizawng dawn tak tak pawh ni ila, “Pradhan mantra ne kaha” tih chauh ka hre bel si. Saptawng in han be ve dawn pawh ni ila, ka thiam zawng zawng pawhin Coffee no khat dawm lek pawh a daih dawn lo tih ka hre si. Kan in be thinrim mai mai lawng maw? Aa.. Ani thei lo, ka tum tak tak a nih chuan zaizir talin ka be hmasa tal ang tiin rilru ka la siam ta fana. Pa deuhin ka che mai ang! Mahse nula leh tlangval inchhai nana zaizira inbiak ngawt thu awm suh! Mahse mahse tih vek a ni.
Ka tum nge ruh uicho ruh: Vai nula ngaihzawn tum tak tak chuan kawng hi a awm ve zel ni hmiang ka ti. Vai ramah kum nga kum ruk dawn kan lo awm ve taa, amaherawhchu, Vai nula in a dera min duh der ve eih pawh ka la hre lo, Kei lahin va duh der tange pawh ka ti lem chuang law! Amaherawh chu tun tum chu ka tum tak tak a ni. kan veng lama kan insawi theihna kha ataka tih hlawhtlin a ngai ve tlat.
Tichuan a hmasa ber atan vai nula, kan class- ami chu mitmei pawh hmu hmasa hawt lo chuan kan college Canteen ah chuan ka date ve taa…. Huiham!! Rin lawk ang ngeiin Hindi kha ka thiam vak silo, a ni lahin English kha a lo thiam lutuk vak bawk silo. A hahthlak phian, tichuan kan vawikhat in date chu kan tling tla ve hrama, (kimchang zawkin sawi lo mai teh ang!) tichuan rilruah “Heng Awze hote nen hian chengza tur chu kan ni sia maw leh! Lalpa” kan ti ngawt peka.
HMABAK:
Hmabak a ko tan hle! Engtin nge min duh theih ang? Ka insawi thei vak dawn em ni? mahni veng lama kan insawi theih ang kha a theih ve tlat loh. Hun leh nite a liam ve zela, min iai vak lo nge a duh chhe ve hrim hrim ka hre lo, kan han in zui ve ang lawp lawp a, min dem fiamtu thianten vai nula ka han ngaizawng thei kha an awt ve deuh a niang, in sawitheih nan pawh nilo, tem chin ve chak hrim hrim avangin, hmela malsawmna dawng ve lo ve tak thianpa Siama’n an tum ve leh kher a, ka tum pakhat chu ka hlawhtling ta phawt. (Heta tem tih hian a kawmkar va dai tihna kher a kawk lo)
KA ZAK TAN:
Vai nula ka ngaizawng thei chu a tirah chuan ka hlim ve khawp mai, zep loah chuan. Khawi ilo kalnaah leh shopping-na velah inzui hun a lo awm lo thei loa, amaherawhchu hnam dang han nih hrim hrim chuan inpawh tak leh thuk taka kal a theih hauh lo.
Mizoram lama ‘Vai chhia’ kan huatna kan chhawm tel tlat kha a apply theih tlat tawh lo. Vai nula hmeltha tak pawh hi kan han hmu hmelchhe lui tlat a, mahse rei a daih lo, hmel chhe te te, chawn puar ping peng te pawh hian Mawi leh nalh chu kan hre vea, kan hisap zuiin kan thlir ve dauh dauh thin. Nie, an sakruang kimtlang leh pianzia a nalh em a ni, keini Tribal ve mai in Vai hrim hrim kan han hmusit ve khanglang/ tum hrang hi chu tlai hnuhnawhah nuih hi a chang chuan a za thin.
Helam ah nge kha lamah:
Vawi khat ka hna bang hawlam pang, unau hmel hai hma deuh hlek si hian Cycle Rickshow ka hma lam pan zawnga lo tlan a hnung seat ah, nula leh tlangval inthlahlel hmel taka an inkuaha, an in fawp ngawng ngawng lai hi ka va hmu kher peka, ka dawn khat vang te pawh a nimahna ka kiau suka, mak ka ti angreng hle.
Lodhi Garden leh hmun dang dang Park- ah teihawi leh vahchhuah pah hian Vai nula leh tlangval inthlahleh tak mitmei veng hauh loa, an han in kiss ngawng ngawng te hi chu hmuh peih chung chuan hmuh tur hi an awma, an dem awm lem in ka hre lo, achhan chu keini Mizo te angin an inrim ngai lova, Shopping Mall, Restaurant leh Park ah te leh Cinema Hall leh hmun dang dangah an in date mai thin, mahse tun ami hi chu an danglam tlat.
Main road a ni loa, mahse public place ah ngei an han in chu-e-kha-e tlat kha a mak ka ti ani.. An lo hnai zela, chiang takin ka hmu thei,… ka thinrim chu ka saphata, mak ka ti in keimah zawk ka zak chem chem mai a, a mualpho thlak ka va ti ngai vela,.. Mizo nula leh tlangval an ni tlat.Kan va peng thui ta em? hmel lam ka zahpui ni lovin, hnamdang a nihna vang a ni. Tichuan zan khat chu ti hian ka ngaihtuah taa, eng vanga in ngaizawng ngawt nge kan nih? Ka Mizo/hnam nihna hi ka hralhphal dawn em ni? nge ka hralh tawh zawk?
Kan Mizo hmei-chhe thenkhat ten hnam dang ngaihzawng an neih vanga thiam in chan chawp mai nge ka nih? Tiin ka ngaihtuah chhunzawm ta zela, ka muhil thei lawk lo. He thil a thlen avang hian kan tlangmi pui thenkhat te hian Mizo an hmuh danah hian a tha zawngin nge rah a chhuaha a chhe zawngin?
Kan hmeichhia thenkhat hetia sawisep an hlawh laia keini MIZO MIPA diktakin kan lo tih ve zel hi a tha dawn em ni? “Ka then tur a ni, ka then ngei tur a ni” tiin thutlukna ka siam taa, mizo hmeichhia hmeltha tak tak, chawn leh tituai nalh tak tak, min duh lo tu an tam zia hisap nauh nauh chungin chumi zan chu a changtupa chu a hnar chhunzawm nghal bawrh bawrha…
No comments:
Post a Comment