Rilru na lutuk lova inthen dan

Inthen i duh tak tak maw? I bansan thei tak tak ang em? Awm dun thei in ni tawh lova i hriat chuan engnge i hmabak tur chu? Awle, i tum tak tak a nih chuan a na lo thei ang berin tih hram tum ta che.
‘Inthen’, ‘Inbansan’ tih tawngkam hian tawrhna leh channa a rawn thlen nghal chamchi a, nangmahni pahnih ngeiin in duhthu a inthen in nih chuan a la zia deuh a, mahse hei pawh hian engemaw chen chu harsatna a thlen tho.
Inthenna atan duhthusam a awm theih loh rualin, tuna kan sawi tur thil te hi kan zawm thei a nih chuan, rilru hrehawm lutuk a veng thei dawn a ni.
1. Chiangkuang takin aw:
‘Engnge lo thleng ta’ tih tur khawp a buai turin engmah a chungah thlentir lo la. Engvanga inthen duh nge i ni tih chiang takin hrilh ang che.
2. Khawiahnge ni ang?
Thenna biahthu hlan nan fianrial aiin puipunna hmun i duh zawk a ni maithei, a dawihzep thlak tlat. Chu ai chuan, a theih hram chuan thil sawi dun dawn pawh a inthlahrunawm lutuk lo hmun thlang hram ang che. Amaherawhchu, hlim taka in lo awmdun tawhna leh in lendun tawh thinna hmun chu thlang suh ang che.
3. Engti tih tur nge?
No.1 a tarlan tak khi hrereng chungin a rilru tihnat loh hram tum tur a ni a, in inthenna chhan chu a hrethiam ngei tur a ni. I tawngkam hman chungchangah fimkhur hle la, dawt erawh i hrilh tur a ni lo. Vawi leh khatah hrethiam lo mah se, zawi zawi in a hrethiam chho zel mai ang.
4. Inthen hnu-ah chuan:
In hnathawhna hmun leh hunin a zir avangte in inhmuh loh theih loh chang a awm a nih pawhin, puitling tak a awmin, chi-ai miah lo a awm tum hram ang che. ‘A la hria ang’ ti a thinrim avanga midang va chhai kual vak ang chi chu tih loh tawp tur a ni.
I chhas khan hun harsa tak a paltlang mek tih hriatpuiin, hun thawl leh a tan pawh a hrehawm lutuk lo turin dah hram thin ang che. Tin, thil fel lo chungchangah, engemaw neuh neuh sawi tum lo la, insum hram a tha bawk. Chuti lo zawng, boruak tha lo lehzual a inherchhuak thei si a.
5. Khureiin a la hnem ve ang che:
Thenna biahthu i hlan khan tuar har a ti ngei ang, nang pawhin rilru natna i nei ve tho ang. ‘Thinlai ah i hlui thei lo...aw i thar leh thin’ tih hi a dik em em a, ‘Ngaihlai ka bang thei lo...mahse khuareiin min la hnem ve mahna’ tih pawh hi dawt a ni chuang lo.
Kan chunga thil thleng tam takte hi thunun theih piah lam a ni fo thin a, amaherawhchu kan lo dawnsawn dan hian a tinep theiin, a tipunlun thei bawk tih hria in, rilru puitling tak leh hmalam thui tak thlir chungin, i chunga thil lo thleng kha pawm thiam tum hram zawk ang che.