MULTIMODAL TRANSPORT PROJECT CHUNGCHANGA MIPUI MAWHPHURHNA

MULTIMODAL TRANSPORT PROJECT CHUNGCHANGA MIPUI MAWHPHURHNA

Multimodal Transport project-in ramngaw leh nungcha a tihchhiat turte endik turin Central sorkar in Mizoram a hriattir tih thu ‘The Zozam Times’ ah May 23rd 2011 khan ziak a ni a, chu chu ka lo chhiar ve a. Zozam Times in a sawi dan chuan May thla tir lam khan Ministry hnuaia Forest Advisory Committee chuan a ngaihtuah a, E&F Department chu Chief Wildlife warden kaihhruaina hnuaiah Monitoring Committee din tur leh kawngpui siam hma leh siam hnu a thil awm dan dik tak zirchiangtu tur Expert Group din turin a hriattir niin The Telegraph chuan a tarlang a ti a. Kan hriat theuh angin kan ram a lo changkan theih zawk na turin Multimodal Transport Project te, Kaladan Hydro Project te kan hmachhawn mek zel a, kan ram tan chuan development ropui leh lawmawm tak chu a ni. Amaherawhchu, hetiang Project liantham reng reng hi chuan a ram clearance a paltlang ngei ngei tur a ni a, chuvang chuan Project khawihtu Company liante pawhin EIA(Environment Impact Assessment) report hi an nei ziah reng a ni. EIA kan tih hi sawi tak ang khan Environmental Impact Assessment tihna a ni a, a tum ber chu Project neihna lai tur ram in a tha zawng leh a chhe zawnga a ram leh mipuite a nghawng dan tur lo duanlawkna a ni tiin kan sawifiah mai thei ang.
He Kaladan Multimodal Transport Project hian ram hactre 196-752 a zau a mamawh a, hei vang hian kan ram ngaw, thing leh mau leh nungchate engemawzat chu a chereu ngei ngei dawn tih chu mitinin kan hre theuh awm e. Ngengpui Wildlife Sanctuary phei chu a chhe viau in a rinawm a, chuvang chuan heng kan ramngaw, kan sik leh sa control tu te hi an lo chereu chuan tuna khawlum leh tui harsa kan tawh mekte hi chuan zual lam a pan zel dawn tihna a ni a, he mi chungchang ah hian mipuite pawhin mawhphurhna lian tak kan nei a ni.
Environment & Forest Department danah chuan, miin thingkung pakhat a kih chuan a thing vekin a compensate tur a ni tih a ni a. Thing tiak phun ringawt lovin a chawm in a enkawl seilian tur a ni tih a ni a. He Project lian kaltlang na tur hian kan ramngaw thing engemawzat chu kih darh a ngai dawn si a, chuvang chuan mimal hlawkna Compensation ringawt buaipui tawh lovin, kan ramngaw kan sik leh sa control tu te lak bo a awm tur hi eng angin nge min compensate dawn tih lam hi ngaipawimawh tawh zawk ang u.
Nungchate awmna tihbuai (disturb) alo ni dawn ta a, khawiahnge riah run an rem tak ang? awmna neih loh avangin min pembo san loh vek pawhin, ei tur mumal leh riahna mumal loh avangte hian min rauhsan mai ang tih a hlauhawm ta hle mai.
Heti khawp a Lawngtlai khawpui leh a chhehvel lum huam huam te hi tun ai hian a lum zual dawn ngei a, a chhan chu a vawngdaitu ramngawte tih chereu an ni dawn si a, hei vang hian ngun taka kan ngaihtuah chu a ngai a ni.
He Multimodal Transport project hi thil tha lutuk, kan ram development na a ni tih chu kan hria, hetia ramngawte tihchhiat a nih dawn avang hian he project hian kutthlak suh se kan tihna a ni hauh lo, he project hi puitling ngei se kan duh, amaherawhchu an tihchhiat tur ramngaw leh nungchate hi a nihna tur leh dan ang thlapin compensate thei se la a lawmawm hle ang.
ka hriatsual loh chuan he Project atan hian Public hearing for Environmental Clearance chu November 2009 khan an nei tawhin ka hria a, hna pawh an thawk tan tawh ngei ang. A lo endik (monitor) hi a bikin ramngaw compensation chungchang ah chuan a ram mipuite hian kan mawhphurh theuh ah ngaiin, tan i la tlang ang u.