Lawngtlai khua leh tui mi hmingtha te pahnih

Lai Students' Association (LSA), General Headquarters Lawngtlai chuan Lawngtlai khua leh tui mi hmingtha te: Lalenkawli, World Junior Women Boxing Champion 2011 leh Samson Thanruma, 'Beiseina Mittui' Book of the Year 2010 ziaktu te chu Ni 7th, May, 2011 (Inrinni) dar 12:30 PM khan LSA General Headquarters Office, Lawngtlai Bazar ah chawmawina hun an hmang.
He chawmawina hun ah hian LSA Gen.Hqrs Vice President Pu, S.Lalmal-sawmsanga chuan a kaihruai a, Pu M.C.Lalrokhuma, Adviser LSA Gen.Hqrs chuan hunserh hmangin, Bible chhiar leh tawngtai in inkhawm hi Pathian hnenah a hlan a. Tv. Lalnunthangmawia (Patea) chuan Technical report pe in, Lalenkawli Boxing khawvela lut tura a lo kaihhruai dan te a sawi a, a lo kaihhruai tawh ten hlawhtlinna an chang chhoh zel hian lawm avangin a lung an tichhiat thu a sawi bawk.
Mizo Academy of Letters (MAL) in kum 2010 chhunga lehkhabu chhuak tha ber a an thlan 'Beiseina Mittui' ziaktu Samson Thanruma chuan thu tawi a sawi a. Lehkhabu ziak tur chuan hrisel that a ngai a, hriselna pe tu Pathian hnenah lawmthu a sawi a. Tin, khawvelah chhim leh hmar ah culture chungchanga inthenhranna a nasat zia chungchang sawiin, 'chhim lam hi a thang chak zawk zel a ni' a ti bawk. Literature khawvelah chhim lam chu fiamthu thawh nan, 'chhim lamah chuan…... chutiang…khatiang… in an ti' tih a tam hle a, hei hi hnam ropui nihna a ni a, huat a la lo a lawm zawk tur a ni ti a sawiin, 'Literature khawvelah kan tluk loh leh phak loh te hi chhaih nawmnah an ni thin a. Huat lam aiin literature hmang vek a kan do let a ngai' tiin a sawi bawk.
A lehkhabu ziakah hmar lama an hman ve lem loh tawngkam a hmang nual a, heng; 'In kuah dam rawh' tih te, 'Kawng rek chawp' tih te, 'Hna kau a tet' tih te leh a dang a hman nual te chu MAL hruaitute'n an sawisel chu a hrilhfiah hnu ah an pawm ve leh thu a sawi bawk a. Ziaktu lar tak tak leh ropui tak tak te zingah Book of the Year dawng thei lo mi engemawzah an awm laia, Book of the Year dawngtu mi tlemte zinga a tel thei chu a lawm takzet a ni tih a sawi bawk.
He hunah hian Lawngtlai tleirawl zaithiam T.Lalhmingtani chuan zai mawi tak in kalkhawmte awiin, a hun nena inhmeh tak hla a sa a. Zaithiamte hian a hun leh hmun nen a inmil tak hla an sak hian an zai mawina a tizualin a tihlu sawt thin. Chuvangin zaithiamte hian a hun leh hmun mila hla sak tur thlan thiam a pawimawhzia hria in uluk takin thlang thin se a duhawm ngawt mai.
Chawhnu lamah Lawngtlai Academy of Letters (LAL) President, Pu K. Hre Kung chuan Book of the Year thlan dan report kimchang tak a pe a. Chumi hnu ah LSA Gen.Hqrs Adviser Dr. J.Doungel chuan thusawiin, 'National Integration rilru a vawng reng chung in hnam leh culture hi a humhalh theih a ni' tiin, National Integration hlamchhiah a hnam humhalh tum chuan mi pawi kan sawi mai thin thu a sawi bawk.
Lalenkawli, , World Junior Women Boxing Champion 2011 chu kalkhawmte'n zawhna zawtin, hetiang hian a chhang a-
Q. : Boxing I zir tan tirh in engti ang in nge I inbuatsaih thin?
Enk : Darthlalang hma ah ka hnek thin.
Q : I khelhpui te zingah tunge khelh har I tih ber?
Enk : Semi final a ka khelhpui kha khelh a har ber.
Q. : Chumi tum chuan chak loh hlauhthawnna I nei em?
Enk : Ring chhunga ka awm tawh chuan hnekna tur bak engmah ka ngaihtuah ngai tawh lo.
Q.: In inkhelhna ah chuan engzat nge I hlawh? Lawmman hi engzat chiah nge I dawn?
Enk : A hmuna kan lawman dawn chu US dollar 250 a ni.
Q.: I pawisa hmuh atangin engzat nge Pathian Ram (PRZ) ah I pek?
Enk : A tawpah a hlawma pek turin kan ti a, kan la dahtha zel.

Book of the Year 2010 "Beiseina Mittui" ziaktu, Pu Samson Thanruma pawh mipui kalkhawmte'n thu zawtin, hetiang hian a chhang -
Q.: Engtik atangin nge thu hi I ziah tan?
Sama : Class-VIII ka zir laiin kum 1991 khan Essay inziaksiakah lawman pakhatna ka la a, chu chun ka ziak hmasak ber a ni.
Q.: Beiseina Mittui hi engtik hun chhung nge I ziak?
Sama : Kum 2007 khan a ruangam hi a irhchhuak tawh a, chu chu April-June 2010 ah a pum a ni.
Q.: A bu kawm a mi hi tunge?
Sama : Hmeichhe thla ah hian a hmei a pa hian kan lungrual ber a. A kawm hma lam a mi hi kan nau pakhat a ni a, a hnunglam a mi hi chu thlalak remchang lak a ni.
Q.: Sex lam hawi I ziak tel chhan?
Sama : Mihring nun reflect tha tawk tur leh social life pholang thei tur ber ka ngaihtuah atangin ka ziak a ni.
Q.: Enginnge thuziak tur hian pui ber thin che?
Sama : Curiosity hi a ni, mi ngaihtuah ve loh thil chik taka ngaihtuah thinna hian thuziak turin min pui khawp mai.
Q.: Thuziak tur hian engnge tul?
Sama : Taimak a ngai khawp mai. Mahni a inkhung hi har hle mah se a tul khawp mai. TV hian hun a la hek nasa em em a, thuziak mi te tan chuan TV hi hmelma lian tak a ni a, a laka inthiarfihlim a tul khawp mai. Tin, tei rei peih a ngai khawp mai bawk.
Q.: Khawvelah engnge I hlauh ber?
Sama : Mi lungleng thei lo nih hi ka hlau ber. Pathian min siam danah mihringte chu nature nen inhne reng tur kan ni a, nature hmangaih nachang kan hriat hi a tul hle a ni. Lunglenna kan neih te hi I ngaihlu ang u.
Q.: I nupui hian eng ti ang takin nge a tanpui che?
Sama : Ka ziak thar hlim apiang hi ka print a, chu chu min lo endik sak a, siam that ngai laite pen tui sen in a lo thai bial thin a. Tin, a thawnthu zawm hre chak takin min tur thin a, chu chuan nasa takin min fuih a ni. Hei bakah hian lehkhabu ka ziah chhung chuan in lamah pasal chhawr-nahawm lo tak ka ni a, chute chung chuan hlim sangin a awm reng thin a, chu chu min tanpui na nasa tak a nihna chhan chu, nupui te an tum hmo mai chuan thluak a thil awm te hi a bo duak thei tlat a ni.
Kan lawmpui e. Ed